“Док-1 Макс” сиропини қабул қилгандан сўнг I гуруҳ ногиронлигига дучор бўлган жиззахлик саккиз ёшли Муслима Зиёбоева 3 июль куни вафот этди.
У Ҳиндистоннинг Marion Biotech компанияси ишлаб чиқарган “Док-1 Макс” ва “Амбронол” совуқ тийишга қарши сиропларини қабул қилгандан кейин ногирон бўлиб қолган ўнлаб болалардан бири эди.
Қизалоқнинг отаси Илҳом Азимов Gazeta.uz нашрига қизи вафот этганини тасдиқлаган.
Суд материалларига кўра:
2022 йил декабрида шифокор тавсиясига биноан, Муслимани ота-онаси кунига уч марта “Док-1 Макс” сиропи билан даволай бошлаган. Кўп ўтмай, қизалоқнинг буйраклари ишлашдан тўхтаган, у сийишни тўхтатган. Аввал маҳаллий шифохонага, сўнгра Тошкентдаги Болалар миллий тиббиёт марказига олиб кетилган.
Йўлда Муслима кома ҳолатига тушиб қолган, бир ҳафтадан кейингина ҳушига келган.
Барча даволаш чораларига қарамай, у I гуруҳ ногиронлигига чиқарилган. 2024 йил ноябрдаги суд жараёнида ота-онаси қизалоқ на ўрнидан тура олиши, на юра олиши, на гапира олиши ҳақида гувоҳлик беришган.
Кенг кўламли фожиа
2022 йил сентябрь–декабрь ойларида Ўзбекистонда ОРВИга қарши “Док-1 Макс” сиропини қабул қилгандан кейин болалар оммавий заҳарланиши кузатилган. Расмий маълумотларга кўра:
- 68 нафар бола вафот этган,
- яна 23 нафари ногирон бўлиб қолган.
Ким айбдор?
Ўтган йил февралида Тошкент шаҳар суди Фармацевтика саноатини ривожлантириш агентлиги собиқ директори Сардор Кариевни 2,5 йилга давлат идораларида ишлаш ҳуқуқидан маҳрум этилиб, 18 йиллик қамоқ жазосига маҳкум этган.
Фармагентлик собиқ директорининг ўринбосарлари Амирхон Азимов ва Нодирбек Мусаев 2 йил 6 ой муддатга давлат органларида раҳбарлик лавозимларида ишлаш ҳуқуқидан маҳрум қилинган ҳолда 16 йилга озодликдан маҳрум этилган
Quramax Medikal директори бўлган Ҳиндистон фуқароси Рагневдра Пратап эса 20 йил озодликдан маҳрум этилган. Жазони ўтаб бўлганидан кейин Сингҳ Рагвендра Пратапни Ўзбекистондан чиқариб юборилиши билдирилган.
Суд ҳукми билан Quramax Medikal МЧЖда турли лавозимларда ишлаган Б. Камбаралиев 3 йил 11 ой 18 кун озодликни чеклаш, Н. Мирзаахмедова шарли равишда 3 йил синов муддати билан 10 йиллик қамоқ, Э. Мирзаахмедов 4 йил муддатга озодликни чеклашга ҳукм қилинди.
“Дори воситаларини стандартлаштириш илмий маркази” МЧЖнинг 12 нафар собиқ ходими ҳам турли муддатларга озодликдан чеклаш ва қамоқ жазоларига ҳукм этилди.
2023 йил августда бошланган ва ярим йил давом этган суд жараёнида маънавий зарарни қоплаш ҳақида қарор қабул қилинди:
- 68 нафар ҳалок бўлган бола ва 4 нафар оғир ногиронликка учраган бола учун — 1 млрд сўм (тахминан 79 минг доллар);
- 4 нафар ўртача ҳолатдаги болалар учун — 500 млн сўм (39,5 минг доллар);
- ҳолати яхшиланган 8 бола учун — 200 млн сўм (16 минг доллар)
Болаларнинг ота-оналари ушбу фожеада Соғлиқни сақлаш вазирлиги мутасаддиларини айблашган.
Ҳуқуқ фаоли Абдураҳмон Тошановнинг Озодликка маълум қилишича, судда “Док-1 Макс” ва шу каби препаратлар мамлакатга коррупцион схема орқали киритилгани ва шу сабабдан улар реализация учун сотувга чиқарилгани аниқланган.
Бу воқеа Ўзбекистондаги соғлиқни сақлаш тизимида шаффофлик ва жавобгарлик масалаларини яна бир боркун тартибига чиқарган.
Форум